ڇا امام زمانه عليه السلام جي ظهور وقت ھڙئي ظالم حڪمران نابود ٿي ويندا ۽ ڪنهن  قسم جو ظلم، پاپُ ۽ ستم ڌرتيءَ تي باقي نه رهندو ؟

ڪجهه ماڻهو سمجهن ٿا ته امام زمان علیه السلام جي ظهور وقت هر قسم جو ظلم ،ڏاڍ ۽  جبر ختم ڪين  ٿيندو ۽ ان زماني ۾ به ظالم ۽ ستمگر موجود هوندا. هو سمجهن ٿا ته ان زماني ۾ ظلم ۽ ظالم جي جڳهه عادل ۽ عدل وٺندو.يعني جهڙيءَ ريت غيبت جي زماني ۾  هر طرف ظلم ۽ ظالم ڇانيَل آهن پر عدل ۽ عادل به موجود آهن جيڪي عدل ۽ انصاف کان ڪم وٺن ٿا، اهڙيءَ ريت ظهور جي زماني ۾ عدل ۽ عدالت، ظلم ۽ نا انصافيءَ جي جڳهه وٺندي پوءِ هر طرف انصاف ۽ عدل جي هاڪ هوندي.پر دنيا جي ڪنڊ ڪڙڇ ۾ ڪي ظالم به موجود هوندا جيڪي ظلم ۾ مشغول هوندا.

انهن جي نظريي  جو سبب هيءَ روايت آهي جنهن کي هو سمجهي نه سگهيا آهن ته :

أنَه یملأ الأرض قسطاً وعدلاً کما ملئت ظماً وجوراً

امام زمانه u دنيا کي عدل ۽ انصاف سان ايئين پُر ڪندا جيئن ظلن ۽ ڏاڍ سان ڀريل هوندي.

هو چون ٿا روايت ۾ لفظ ( کما ) استعمال ٿيو آهي جنهن جي معني (جهڙيءَ ريت) آهي جيڪا سندن جي نظريي جي صحيح هجڻ تي دلالت ڪري ٿي.جيتوڻيڪ غيبت جي زماني ۾ دنيا ظلم ۽ نا انصافيءَ سان ڀريل آهي پر ڪٿي ڪٿي ٿورڙو عدل ۽ عدالت جو راڄ به آهي.

انهن جو عقيدو آهي ته ( کما ) يا (جهڙيءَ ريت) جي معنى ان کي سمجهائي ٿي ته ظهور جي زماني ۾ دنيا عدل ۽ انصاف سان ڀرجي ويندي پر دنيا جي  ڪنهن ڪنڊ ڪڙڇ ۾ ظلم ۽ ظالم به هوندا جيڪي ماڻهن تي ظلم ڪندا.

جواب:

اسان ان وهم ۽ شُبهي جي جواب ۾ چوندا سين ته : انهن جيڪو ڪجهه ان روايت مان سمجهيو آهي، صحيح ناهي ۽ اِهو ٻين آيتن ۽ روايتن جي مخالف آهي.

وضاحت:

قرآن مجيد ۾ ( کما ) جو لفظ ڪيترين جڳهن تي تشبيه ۽ شباهت لاءِ آيو آهي ۽ اهو ڪڏهن به  لازم ناهي ته ( کما ) جي بعد وارو هر لحاظ سان ( کما ) جي پهريان واري سان  بلڪل هڪجهڙو هجي .

ڌڻي تعالى قرآن مجيد ۾ فرمائي رهيو آهي ته :

إنّا أوحینا إلیک کما أوحینا إلی نوح والنبیین من بعده.... (سورۀ نساء، آیۀ 163)