تلّۂ زینبیہ

حاج سعد نے اپنے پدر بزرگوار جناب حاج عبد الامیر اسدی (جو اس مقام کے فرائض انجام دیتے تھے اور وہاں کے امور کو دیکھتے تھے ) سے نقل کیا ہے کہ انہوں نے عالم خواب میں دیکھا کہ گویا وہ اپنی عادت کے مطابق ضریح کے بالکل ساتھ بیٹھے ہوئے ہیں اور ان کے پاس ایک شمعدان بھی ہے ۔ اسی دوران ایک جلیل القدر سید داخل ہوئے ، جن کے چہرے پر وقار اور ہیبت کے آثار نمایاں تھے ، اور ان کے ساتھ کچھ جلیل القدر علویات بھی تھیں ۔ سید نے اپنے دست مبارک سے ضریح مطہر کی طرف اشارہ کیا اور ان سے فرمایا : ’’یہ ہماری پھوپھی زینب (سلام اللہ علیہا) کا مقام ہے‘‘۔ پھر انہوں نے گریہ اور آہ و نالہ کرتے ہوئے زیارت پڑھنی شروع کی اور زیارت پڑھنے کے بعد امام حسین علیہ السلام کے مرقد مطہر کی طرف چلے گئے ۔ وہ  اس بات کے معتقد تھے کہ وہ بزرگ سید حضرت حجت سلام اللہ علیہ تھے ، اور ان کی دلیل یہ ہے کہ انہوں نے فرمایا : ’’یہ ہماری پھوپھی زینب (سلام اللہ علیہا) کا مقام ہے‘‘۔