انسان کی ترقی میں توفیق کا کردار
نیک کام انجام دینے کے لئیانسان کو خداوند متعال کی جانب سے توفیق اور عنایت کی ضرورت ہوتی ہے،جب تک توفیق الٰہی شامل حال نہ ہو تب تک وہ کسی بھی خدا پسندانہ کام کو انجام دینے میں کامیاب نہیں ہوسکتا۔لہٰذا اپنے اہداف تک پہنچنے اور اپنے امور زندگی میں کامیابی کے لئے خداوندعالم سے دعا کرنا ضروری ہے کہ اے پروردگار ہمیں توفیق عطا فرما کہ ہم اہم اور عالی اہداف و مقاصد تک پہنچ سکیں اور ان کا حصول ہمارے لئے آسان فرما۔
حضرت جوادالائمہ امام محمد تقی (ع) فرماتے ہیں:
''اَلمُؤمِنُ ےَحتاجُ اِلٰی تَوفِیقٍ مِن اللّہ وَ وَاعِظٍ مِن نفسہ وَ قَبُول مِمَّن ےَنصَحَہ''([1])
مومن تین چیزوں کا محتاج ہے:
١۔ خدا کی طرف سے حاصل ہونے والی توفیق۔
٢۔ اپنے نفس کے ذریعہ خود کو وعظ کرنے والا ہو۔
٣۔ جو اسے نصیحت کرے اس کی نصیحت قبول کرے۔
اس فرمان کی رو سے توفیق الٰہی ہر مومن شخص کی ضرورتوں میں سے ہے تاکہ اس کی مدد سے وہ اپنے ارادہ کو عملی جامہ پہنائے،زیارت سے مشرف ہوتے وقت جس دعا کو پڑھنا مستحب ہے،اس دعا میں کہتے ہیں:
''اَلَّلھُمَّ صِل ۔۔۔ نِیَّتی بِاالتَوفِیق '' ([2])
پروردگارا میرے ارادہ کو تو فیق کے ساتھ متصل فرما۔
کیونکہ جس خدا پسندانہ اور نیک کام کی نیت و ارادہ میں توفیق الٰہی شامل نہ ہو ،وہ کام کبھی بھی مؤثر نہیں ہوتا۔
لہٰذا انسان کی نیت و ارادہ ،توفیق الٰہی کے ہمراہ ہونی چاہئے تاکہ کام پایہ تکمیل تک پہنچ سکے ۔ لیکن اگر نیت کے ساتھ توفیق الٰہی شامل نہ ہو تو اس کام کا کوئی عملی اثر نہیں ہوگا،اگرچہ انسا ن وعدہ دیئے گئے ثواب سے بہرہ مند ہوجائے گا۔
اس بناء پر خدا کی توفیق ہر مؤمن کی ایک اہم ترین ضرورت ہے۔کیونکہ کسی نیک کام کو انجام دینے کی قدرت اور نیت ،اس کام کے وقوع پذیر ہونے کی علت تامّہ نہیںہے۔
کارِ خیر کو انجام دینے کے لئے نیت اور توانائی کے علاوہ توفیق الٰہی کی بھی ضرورت ہوتی ہے،اگر خدا کی توفیق آپ کے شامل حال نہ ہو تو نیک کام انجام دینے کا امکان ہی نہیں ہے۔
خدا وند متعال قرآن میں حضرت شعیب کے قول کو یوں بیان فرماتا ہے ،جو انہوں نے اپنی قوم سے فرمایا تھا:
'' اِن اُرِیدَ اِلّا الاِصلَاح مَا اَستَطَعتُ وَ مَا تَوفِیقِی اِلَّا بِاللّٰہ '' ([3])
میں تو صرف اصلاح چاہتا ہوں، جہاں تک میرے امکان میں ہو،میری توفیق صرف اللہ سے وابستہ ہے۔
اس آیت سے معلوم ہوتا ہے کہ کسی نیک کام کو انجام دینے کے لئے فقط استطاعت اور قدرت کافی نہیں ہے بلکہ خدا کی توفیق بھی مورد نیاز ہے۔
پروردگا ر کی توفیق اور لطف انسان کی قوت اور قدرت کی تکمیل کرتی ہے ورنہ صرف انسان کی توانائی مشکلات کو حل کرنے سے قاصر ہے۔
اس بیان کی رو سے نہ صرف عام افراد بلکہ اولیاء ِخدا اور بزرگانِ دین بھی اسی صورت میں نیک کاموں کو انجام دینے میں کامیاب ہوسکتے ہیں کہ جب خدا کی جانب سے توفیق شاملِ حال ہو۔
اس نکتہ کی جانب توجہ نہ صرف لازم اور ضروری ہے، بلکہ اس کے بہت اہم اثرات بھی ہیں۔
اس نکتہ پر اعتقاد اور توجہ کہ تمام افراد کے لئے خداپسندانہ امور کو انجام دینے میںتوفیق الٰہی کا حاصل ہونا نہ صرف لازم اور ضروری ہے بلکہ اس کے بہت مہم اثرات بھی ہیں اور وہ یہ کہ اس سے انسان میں غرور اور تکبر پیدا نہیں ہوتا۔اولیائِ خدا اور بزرگان دین اس حقیقت سے آشنا ہیں کہ ان کے تمام نیک کاموں میں خدا کی توفیق شامل ہے، لہٰذا ان میں غرور اور تکبر پیدا نہیں ہوتا۔
وہ اس دنیا میں خود کو کچھ بھی نہیں سمجھتے،اس اعتقاد سے ان کے اخلاص میں اضافہ ہوتا ہے۔جو انہیں خود پسندی اور انانیّت سے باز رکھتا ہے۔
صبر بردرد، نہ از ہمت مردانہ ماست
درد از او، صبر از او، ہمت مردانہ از اوست
دگری را بہ جز او،راہ بہ ویرانہ دل
نتوان داد،کہ این گوشہ ویرانہ از او ست
شمع و پروانہ از او سوختن آموختہ اند
شعلہ شمع از او ،سوزش پروانہ از اوست
مصیبتوں پہ صبر ہماری مردانگی کی علامت نہیں ہے ، صبر درد اور ہمتِ مردانہ اسی کی عطا ہے لہذا اپنے دل میں اس کے علاوہ کسی اور کو نہ بٹھائوکیونکہ یہ دل اسی کا گھر ہے، شمع اور پروانے نے جلنا اسی سے سیکھا شمع کا شعلہ اور پروانے کا جلنا بھی اسی سے ہی ہے۔
آج کے وزٹر : 15165
کل کے وزٹر : 239619
تمام وزٹر کی تعداد : 124245976
|